ОИВ инфекцияси ва ОИТС бугунги кунда жаҳон миқёсида долзарб тиббий-ижтимоий муаммолардан бири бўлиб қолмоқда. Вирус иммун тизимини заифлаштириб, организмнинг турли касалликларга қарши курашиш қобилиятини пасайтиради. Шу боис унинг олдини олиш чораларига амал қилиш муҳим аҳамиятга эга.
ОИВ ҳақида тўғри ва ишончли маълумотларни кенг тарқатиш профилактиканинг энг самарали усулларидан бири ҳисобланади. Хабардорлик инсонни хавфли ҳолатлардан сақлашга ёрдам беради.
Профилактиканинг муҳим йўналишларидан бири — хавфсиз ҳаёт тарзига риоя қилиш. Жумладан, жинсий алоқада презервативдан фойдаланиш ОИВ юқиш хавфини камайтиради. Шунингдек, тасодифий жинсий алоқалардан сақланиш ҳам муҳим профилактик чора ҳисобланади.
Инфекция тарқалишининг олдини олишда тиббий хавфсизликка ҳам алоҳида эътибор қаратиш зарур. Стерил ва бир марталик тиббий асбоблардан фойдаланиш, қон қуйишда текширилган қон маҳсулотларини ишлатиш муҳим аҳамиятга эга. Наркотик моддаларни инъекция орқали қабул қилиш эса ОИВ юқиши хавфини оширади.
Мунтазам ОИВ текширувидан ўтиш ҳам профилактиканинг муҳим қисми ҳисобланади. Инфекция эрта аниқланса, уни назорат қилиш, асоратларни камайтириш ва бошқаларга юқтириш хавфининг олдини олиш имконияти ортади.
Ҳомиладор аёлларни ўз вақтида текшириш онадан болага инфекция юқишининг олдини олишда муҳим аҳамият касб этади.
ОИВ профилактикаси ҳар бир инсоннинг шахсий масъулияти билан бирга жамият саломатлигини муҳофаза қилишнинг муҳим қисми ҳам ҳисобланади. Соғлом турмуш тарзи, тўғри маълумот ва ўз вақтидаги текширувлар инфекция тарқалишининг олдини олишга хизмат қилади.
Зилолахон ТАДЖИБАЕВА,
вилоят ОИТСга қарши кураш маркази
эпидемиолог ёрдамчиси.
