Farg‘onada endokrin kasalliklar bo‘yicha vaziyat tahlil qilindi

Farg‘ona shahrida viloyat davolash-profilaktika muassasalari rahbarlari hamda endokrinolog mutaxassislar ishtirokida endokrin kasalliklar bo‘yicha mavjud epidemiologik vaziyat, sohadagi muammolar va ularni bartaraf etish choralari muhokama qilindi.

Tahliliy taqdimotni To‘raqulov nomidagi Respublika ixtisoslashtirilgan endokrinologiya ilmiy-amaliy tibbiyot markazi direktori, professor Anvar Alimov taqdim etdi. Unda Farg‘ona viloyatida endokrinologik xizmatni 2026–2030 yillarda rivojlantirish strategiyasi, sohaning normativ-huquqiy asoslari, moddiy-texnik bazani mustahkamlash, kadrlar salohiyatini oshirish, xalqaro hamkorlik va mutaxassislarning kasbiy malakasini rivojlantirish masalalariga alohida e’tibor qaratildi.

Taqdimotda qandli diabetning tarqalish dinamikasi ham tahlil qilindi. Qayd etilishicha, hozirgi kunda viloyatda qariyb 49 ming nafardan ortiq bemor dispanser hisobida turadi. Shu bilan birga, xalqaro ekspertlar hisob-kitoblariga ko‘ra, qandli diabetning haqiqiy tarqalish ko‘rsatkichi rasmiy statistikaga nisbatan 2–3 barobar yuqori bo‘lishi mumkin.

Ta’kidlanganidek, bemorlar sonining ortishi faqat kasalliklar ko‘payishi bilan emas, balki aholi o‘rtacha yoshining oshib borishi, semizlikning kengayishi, jismoniy faollikning kamayishi, ovqatlanish tartibining o‘zgarishi, erta diagnostika imkoniyatlarining yaxshilanishi hamda aholi umr davomiyligining uzayishi bilan ham bog‘liq.

Yig‘ilishda qandli diabet asoratlari, ularning oldini olishda dispanser nazoratining ahamiyati, bemorlarni dori vositalari bilan ta’minlash tizimi ham atroflicha tahlil qilindi. Shuningdek, O‘zbekiston Respublikasi Vazirlar Mahkamasining 382-son qarori doirasida bemorlarni dori vositalari bilan ta’minlash, tibbiy reaktivlarga bo‘lgan ehtiyoj hamda diabetik oyoq sindromi oqibatida yuzaga keladigan amputatsiyalar sonini kamaytirish bo‘yicha takliflar muhokama qilindi.

Mutaxassislar tomonidan reanimatsion yordam samaradorligini oshirish, tez tibbiy yordam brigadalarini glyukometr va test-poloska bilan to‘liq jihozlash zarurligi qayd etildi.

Tadbirda, shuningdek, qalqonsimon bez kasalliklari tarqalishi, tug‘ma gipotireozni erta aniqlash va uning oldini olish, bolalarda past bo‘ylik sindromini o‘z vaqtida tashxislash hamda davolash muassasalari oldida turgan ustuvor vazifalar yuzasidan ham fikr almashildi.

Yig‘ilish yakunida Respublika ixtisoslashtirilgan endokrinologiya ilmiy-amaliy tibbiyot markazi direktorining o‘rinbosari Sevara Faxrutdinova sohada joriy etilayotgan raqamli platformadan samarali foydalanish bo‘yicha ishtirokchilarga amaliy ko‘rsatmalar berdi.