OIV profilaktikasi: infeksiyaning oldini olishda nimalar muhim?

OIV infeksiyasi va OITS bugungi kunda jahon miqyosida dolzarb tibbiy-ijtimoiy muammolardan biri bo‘lib qolmoqda. Virus immun tizimini zaiflashtirib, organizmning turli kasalliklarga qarshi kurashish qobiliyatini pasaytiradi. Shu bois uning oldini olish choralariga amal qilish muhim ahamiyatga ega.

OIV haqida to‘g‘ri va ishonchli ma’lumotlarni keng tarqatish profilaktikaning eng samarali usullaridan biri hisoblanadi. Xabardorlik insonni xavfli holatlardan saqlashga yordam beradi.

Profilaktikaning muhim yo‘nalishlaridan biri — xavfsiz hayot tarziga rioya qilish. Jumladan, jinsiy aloqada prezervativdan foydalanish OIV yuqish xavfini kamaytiradi. Shuningdek, tasodifiy jinsiy aloqalardan saqlanish ham muhim profilaktik chora hisoblanadi.

Infeksiya tarqalishining oldini olishda tibbiy xavfsizlikka ham alohida e’tibor qaratish zarur. Steril va bir martalik tibbiy asboblardan foydalanish, qon quyishda tekshirilgan qon mahsulotlarini ishlatish muhim ahamiyatga ega. Narkotik moddalarni in’eksiya orqali qabul qilish esa OIV yuqishi xavfini oshiradi.

Muntazam OIV tekshiruvidan o‘tish ham profilaktikaning muhim qismi hisoblanadi. Infeksiya erta aniqlansa, uni nazorat qilish, asoratlarni kamaytirish va boshqalarga yuqtirish xavfining oldini olish imkoniyati ortadi.

Homilador ayollarni o‘z vaqtida tekshirish onadan bolaga infeksiya yuqishining oldini olishda muhim ahamiyat kasb etadi.

OIV profilaktikasi har bir insonning shaxsiy mas’uliyati bilan birga jamiyat salomatligini muhofaza qilishning muhim qismi ham hisoblanadi. Sog‘lom turmush tarzi, to‘g‘ri ma’lumot va o‘z vaqtidagi tekshiruvlar infeksiya tarqalishining oldini olishga xizmat qiladi.

Zilolaxon TADJIBAYeVA,
viloyat OITSga qarshi kurash markazi
epidemiolog yordamchisi.