Farg‘onada sog‘liqni saqlash tizimidagi dolzarb masalalar muhokama qilindi

O‘zbekiston Respublikasi Prezidenti Administratsiyasi mas’ullari Shohruh Shorahmetov va Umida Gaziyeva boshchiligida Farg‘ona viloyati sog‘liqni saqlash muassasalari rahbarlari ishtirokida ochiq muloqot o‘tkazildi.

Tadbirni viloyat hokimining o‘rinbosari Sherzod Polvonov olib bordi.

Muloqot avvalida viloyat sog‘liqni saqlash boshqarmasi boshlig‘i Bobur Primqulov hududdagi sog‘liqni saqlash tizimi faoliyati yuzasidan taqdimot qildi. Unda sohada erishilayotgan natijalar, mavjud muammolar hamda ularni bartaraf etish bo‘yicha amalga oshirilayotgan ishlar haqida ma’lumot berildi.

Xususan, endokrinologiya sohasida mutaxassislar yetishmovchiligi, mazkur yo‘nalishdagi tahlillar va takliflar muhokama qilindi. Shuningdek, onalar va bolalar o‘limi holatlari tahlil qilinib, bu boradagi ustuvor vazifalar belgilab olindi.

Tadbirda Respublika ixtisoslashtirilgan kardiologiya ilmiy-amaliy tibbiyot markazi direktori, tibbiyot fanlari doktori, professor Xurshid Fozilov ham ishtirok etib, tizimdagi mavjud muammolar va ularning yechimiga doir takliflarini bildirdi.

Quva tumani sog‘liqni saqlash bo‘limi boshlig‘i Ravshan Isaqov hududda amalga oshirilgan ishlar va erishilgan natijalar haqida axborot berdi. U aholi o‘rtasida birlamchi tibbiy xizmatdan foydalanish madaniyati shakllanib borayotgani va tibbiy xizmatga bo‘lgan munosabat ijobiy tomonga o‘zgarayotganini ta’kidladi.

Muloqot davomida Prezident Administratsiyasi mas’uli Umida Gaziyeva sohadagi ayrim kamchiliklar yuzasidan o‘z munosabatini bildirdi. Shuningdek, viloyatdagi davolash-profilaktika muassasalari rahbarlari ham o‘z fikr va takliflarini o‘rtaga tashladilar.

Shundan so‘ng tadbir Farg‘ona Expo markazida davom ettirildi. U yerda viloyatda faoliyat yuritayotgan xususiy klinikalar rahbarlari bilan uchrashuv o‘tkazilib, xususiy tibbiyot muassasalarini rivojlantirish, sohaga investitsiyalarni jalb etish va ko‘rsatilayotgan xizmatlar sifatini oshirish masalalari muhokama qilindi.