Сарвархон Юлдашов 2016 йилда Тошкент тиббиёт академиясининг «Даволаш иши» йўналишини тамомлаб, Қўштепа туманида умумий амалиёт шифокори ва тез тиббий ёрдам бўлими чақирув врачи бўлиб ишлаган. 2019 йилда офтальмология бўйича магистратурага ўқишга кириб, 2022 йилда шу мутахассисликни эгаллаган.
Шу йилдан бери у Республика ихтисослаштирилган кўз микрохирургияси илмий-амалий тиббиёт марказининг Фарғона филиалида врач-офтальмолог бўлиб ишлайди. Бугун 35 ёшли шифокорнинг тиббиётдаги меҳнат стажи 10 йилга етган.
Сарвархоннинг фаолияти клиник амалиёт билан чекланмайди. У Фарғона жамоат саломатлиги тиббиёт институтининг «Умумий хирургия» кафедрасида ассистент бўлиб, талабаларга клиник фанлардан дарс беради. Хорижий факультет талабаларига машғулотларни инглиз тилида олиб боради.
Сарвархон 2023 йилдан Тошкент тиббиёт академияси таянч докторанти сифатида «Тиреотоксикоз фонида кўз олмасининг клиник-морфологик хусусиятлари» мавзусида тадқиқот олиб бормоқда. Ҳозирда унинг PhD диссертацияси ҳимоя босқичида. Шу вақтга қадар у 30 та илмий мақола, 18 та тезис, бир услубий тавсиянома ва бир дастурий гувоҳнома муаллифи бўлган.
Сарвархондан «Нега айнан офтальмологияни танлагансиз?» деб сўраганмизда, у бу қарорни йиллар ўтиб бошқача англаганини айтади.
— Баъзи касбларни инсон танламайди. Баъзан касбнинг ўзи сизни танлайди. Мен офтальмологияни танлаган пайтимда бу касб ортида шунчалик катта масъулият борлигини ҳали тўлиқ англамаган эканман. Йиллар ўтиб тушундимки, биз шунчаки кўз билан эмас, инсоннинг дунёни қандай кўриши билан ишлаймиз.
Бемор шифокорга қараб, баъзан қўрқув, баъзан умид билан «Мен яна кўра оламанми?» деган саволни беради.
— Даволаш ёки операциядан кейин беморнинг атрофга қараб, дунёни яна аниқ кўраётганини кўриш — мен учун энг катта мукофот. Баъзан у ҳеч нима демайди, фақат жилмаяди. Шу табассумнинг ўзи етарли, — дейди у.
Унинг фикрича, кўриш фақат физиологик функция эмас.
«Кўриш — инсоннинг ҳаёт билан боғланишидир. Офтальмологияда эса баъзан инсонга ўз дунёсини қайтаришга ёрдам берасиз», — дейди Сарвархон.
Сарвархон ўз соҳасидаги янги усуллар ва ёндашувларни ўрганиш учун хорижий курслар ва конгрессларда ҳам қатнашиб келмоқда.
2024 йилда Ҳиндистондаги «Sharp Sight» кўз шифохоналари гуруҳи ташкил этган клиник малака ошириш курсини тамомлаб, катаракта ва витреоретинал жарроҳлик бўйича ўқиди.
Шунингдек, Испаниянинг Барселона шаҳрида ўтказилган 42-ESCRS конгрессида иштирок этди. Унда қатнашгани ва халқаро аккредитациядан ўтганини тасдиқловчи сертификат олди.
Юлдашов «International Ophthalmological Congress IOC Uzbekistan» каби халқаро тиббий тадбирларда ҳам иштирок этган.
Бу қизиқишининг сабаби, унинг ўзи таъкидлаганидек, офтальмологияда диагностика ва жарроҳлик усулларининг тез ўзгариб боришида. Шунинг учун у шифокор учун ўқиш ва янгиликларни кузатиш касбнинг ажралмас қисми, деб ҳисоблайди.
