Inson qadri ustuvor bo‘lgan islohotlar

Mustaqillik yillarida inson salomatligi eng ustuvor qadriyatga aylandi. Rishton tumanida ona va bola salomatligini muhofaza qilish yo‘lida amalga oshirilayotgan islohotlar buning amaliy ifodasidir.

Raqamlarga e’tibor qaratsak, 2025 yilda tuman tibbiyot birlashmasi tug‘ruq bo‘limida qo‘shimcha 10 ta, reanimatsiya bo‘limida esa 3 ta yangi o‘rin-joy tashkil etildi. Bu esa og‘ir ahvoldagi onalar va chaqaloqlarga o‘z vaqtida malakali tibbiy yordam ko‘rsatish imkoniyatini yanada kengaytirdi.

Tug‘ruq bo‘limi ham zamonaviy talablar asosida faoliyat yuritmoqda. Bo‘lim hamshirasi Gulnora Sattorovaning ta’kidlashicha, bu yerda har kuni o‘rtacha 15 nafar yangi tug‘ilgan chaqaloq milliy emlash taqvimi asosida rejali emlanmoqda. Bu esa kelajak avlod sog‘lig‘ini ta’minlash yo‘lidagi muhim choralardan biridir.

2024–2026 yillarda onalik va bolalikni muhofaza qilish yo‘nalishida amalga oshirilgan tizimli ishlar o‘zining amaliy natijasini ko‘rsatmoqda. Xususan, hisobot davrida onalar o‘limi holati qayd etilmadi. Bu — tibbiyot tizimidagi eng muhim natijalardan biri sanaladi.

03
01
02
04
06
05
07

Bolalar o‘limi ko‘rsatkichlari ham kamaymoqda. Agar 2025 yilning birinchi yarim yilligida ushbu ko‘rsatkich 20 tani tashkil etgan bo‘lsa, 2026 yilning shu davrida 12 taga tushdi. Bu esa ona va bola salomatligini muhofaza qilish bo‘yicha amalga oshirilayotgan chora-tadbirlar o‘z samarasini berayotganining yaqqol isbotidir.

— Ayni paytda bo‘limda 55 ta koyka mavjud bo‘lib, yaqin kunlarda yana 10 ta yangi o‘rin-joy foydalanishga topshiriladi, — deydi neonatolog Muhayyoxon Nuraliyeva. Bu esa yangi tug‘ilgan chaqaloqlarga ixtisoslashtirilgan tibbiy xizmat qamrovini yanada kengaytiradi.

Bolalar bo‘limi ham zamonaviy tibbiy uskunalar bilan jihozlangan. Bu yerda nafas olish, puls, saturatsiya va qon bosimini nazorat qiluvchi monitorlar, kislorod konsentratorlari, elektrootsoslar, shprits nasoslari hamda «Termo Bebi» qurilmalari orqali bolalarga yuqori sifatli tibbiy yordam ko‘rsatilmoqda.

Shu bilan birga, sohada oldinda turgan vazifalar ham mavjud. Jumladan, chaqaloqlar, bolalar va kattalar reanimatsiya bo‘limlarini zamonaviy talablar asosida joriy ta’mirlash dolzarb vazifalardan biri hisoblanadi. Bu maqsadda 200 million so‘mlik qurilish materiallarini homiylik asosida jalb etish rejalashtirilgan.

Rishtonda amalga oshirilayotgan bu ishlar bir haqiqatni yana bir bor tasdiqlaydi: tibbiyotdagi islohotlarning markazida bino yoki texnika emas, avvalo inson turibdi. Inson salomatligiga kiritilayotgan har bir sarmoya esa mamlakat kelajagiga qaratilgan eng qimmatli investitsiyadir. Mustaqillik yillarida shakllangan ana shu yondashuv bugun har bir ona, har bir bola va har bir oilaning hayotida o‘zining amaliy ifodasini topmoqda.