Фарғона вилоятининг таниқли жарроҳи Иброҳимжон Умаров ўн беш йил муқаддам юрак касаллигига дучор бўлган эди. У кўп суҳбатларда бундан кейин пиёда юришини мақсад қилиб қўйганини ва бунинг уддасидан чиқиб, пиёда юриш кундалик ҳаётига айланганини билдирган.
—2010 йилда юрак касаллиги билан хасталандим. Жуда ҳам оғир ётиб қолдим. Шифокорларимизнинг меҳнати билан худога шукур мана ҳаётга қайтдим. Шундан кейин жисмоний фаол бўлишни ўзимга мақсад қилиб қўйдим. Даволаниш чоғимда Чортоқ сиҳатгоҳидаги спорт тренерим 200 метр юрасиз, ундан ортиқ юрмайсиз, деган эди. Ҳа, бу 200 метр юрадиган бўлсам, ҳаётнинг нима қизиғи қолади?! Шифокор бўлсам, юришим, ишлашим керак деганман. Кейинчалик машинамни сотдим ва пиёда юришни бошладим. Бугунги кунда 4000 қадам юряпман. Ҳар куни эрталаб соат 6 да шаҳримизнинг гўзал гўшаларидан бирига келаман (Фарғона шаҳридаги Ислом Каримов номли вилоят Театр-концерт саройи ҳиёбони-таҳр). Ёз кунлари эса сал эртароқ келаман. Қишда ҳам тўхтамадим. Шундан кейин ўзимни яхши ҳис қилдимки, бошқа касал бўлмадим. Спорт билан шуғуллангандан кейин, нафақат юрак, балки бутун суяк таянч органларида, оёқларимда, мушакларимда касаллик аста секин чекина бошлади. Мана бугунги кунда Аллоҳга шукур соғман.
Агар инсон ҳохласа имконият топади. Ўзининг соғлиги ўзига керак. Агар шунга вақт топса, эрталабми, кечқурунми, ярим соат, бир соат жисмоний ҳаракат билан шуғулланса ўзи учун қанчалик яхши?! Эскилар айтишган, соғлигингда юрмасанг, касаллигингда юрасан. Шунинг учун ҳаммага айтаман, шу ҳиёбонга келинглар. Гуллар экилган, сувлар сепилган. Булар биз учун қилинганку ахир. Мен мана шу ерга келсам дам олиш учун келгандек бўламан. Биронта санаторийда юргандек бўламан. Эрталаб келаман, одамлар кам. Тўйиб нафас оламанки, қон босимларим умуман кўтарилмайди.
Ўзбекнинг тўйи, маросими кўп. Чойхона-ю, ошхонаси ҳам. Уйда ёғли, оғир овқатларни тайёрлаб тановул қилишни яхши кўрамиз. Лекин, бундай таомларга яраша жисмоний ҳаракатнинг ўзи йўқ.
Инсонлар ўзларини сақлаши керак. Ёғли овқатларни меъёрида истеъмол қилиш зарур. Шунингдек, жисмоний ҳаракатда ёки жисмоний тарбия билан шуғулланиб, организмдан чиқариб юборишимиз керак бўлади.
Кимни бахтли санаш мумкин, деган саволга бир донишманд жисмоний соғлом, руҳий ҳотиржам ҳамда истеъдодини ўстира олган кишини, дея жавоб берган экан. Фарзандларимиз бахтли ва соғлом бўлишларини ҳохлаймиз. Бунинг учун аввало ўзимиз соғлом бўлмоғимиз шарт! Кейин жамият ҳам соғлом бўлади.
Мен пиёда юришни одатга айлантирдим. Сизчи?
