Президент Шавкат Мирзиёевнинг “Яшил макон” лойиҳаси доирасида кўчат экиш тадбири ва Миллий дендрология боғини барпо этиш ташаббуси юртдошларимиз учун катта илҳом манбаи бўлди. Ушбу саъй-ҳаракатлар нафақат мамлакатимизнинг яшиллаштириш даражасини сезиларли оширмоқда, балки экологик барқарорлик, аҳоли саломатлиги ва замонавий техник имкониятлардан самарали фойдаланишга ҳам хизмат қилади.
Ҳар йили 200 миллион туп кўчат экиш, 942 та боғ ва парк, 256 минг гектар ўрмон ва 2 миллион гектар ҳимоя ўрмонзорлари ташкил этилиши мамлакатда атроф-муҳитни муҳофаза қилиш ва сувсизликка чидамли галофит боғларини яратиш каби стратегик аҳамиятга эга лойиҳаларни амалга оширмоқда. Янги фармон билан 2030 йилга қадар умумий яшиллик 30 фоизга етказилиши ва ҳар бир жонга 10 квадрат метр яшил ҳудуд тақсимланиши белгилангани бу йўналишдаги катта марра сифатида баҳоланиши мумкин.
Шу билан бирга, аҳоли ва депутатларнинг фаол иштироки, “Менинг боғим” дастури маблағининг оширилиши, вилоятларда техникумлар очилиши ва ботаника ҳамда дендрология боғлари орқали мутахассислар тайёрлаш эса лойиҳанинг барқарор ва самарали ривожланишини таъминлайди. Пойтахтимизда Миллий дендрология боғи ва “Яшил” университетнинг илмий базалари эса бу йўналишда илғор модел бўлиб хизмат қилади.
Тадбир якунида юртдошларимиз томонидан 164 гектар майдонда 88 минг туп кўчат экилиши ва Президентнинг илк 5 гектар майдонда кўчат қадаши бу ташаббуснинг жамоавий ва самарали ижросини намоён қилди. Умуман олганда, бу саъй-ҳаракатлар миллий анъана ва қадриятларни замонавий экология лойиҳалари билан уйғунлаштиришда муҳим қадам саналади.
И.Абдужабборов,
«Фарғона шифокори» газетаси бош муҳаррири.
